ԳԼԽԻ ՏԵՂԱԳՐԱԿԱՆ ՇՐՋԱՆՆԵՐԸ

Գլուխը պարանոցից բաժանվում է մի պայմանական գծով, որն անցնում է՝

• ստորին ծնոտի ստորին եզրով,
• ստորին ծնոտի անկյունով (angulus mandibulae),
• ստորին ծնոտի վերել ճյուղի հետին եզրով,
• արտաքին լսողական անցուղու ստորին եզրերով,
• պտկաձև ելունի առաջային և հետին եզրերով,
• վերին վզարմատային գծով դեպի,
• արտաքին ծոծրակային ցցաթումբ (protuberantia occipitalis externa):

Գլուխը իր հերթին բաժանվում է 2 շրջանի՝

1. ուղեղային շրջան
2. դիմային շրջան

Գլխի ուղեղային և դիմային շրջանների սահմանը անցնում է՝

• վերակնակապճային եզրով (margo supraorbitalis),
• ակնակապճի վերին դրսային եզրով,
• այտային աղեղի վերին եզրով մինչև
• արտաքին լսողական անցուղի(meatus acusticus externus):

Գլխի ուղեղային բաժինը իր հերթին բաժանվում է՝

1. գանգի հիմի (basis cranii)
2. գանգաթաղի (fornix cranii, calvaria)

Գանգաթաղի և գանգի հիմի միջև սահմանը հորիզոնական տարված մի հարթություն է, որն անցնում է՝

• վերակնակապճային եզրով,
• այտային աղեղի վերին եզրով,
• պտկաձև ելունի հիմով,
• վերին վզարմատային գծով մինչև
• արտաքին ծոծրակային ցցաթումբ։

Գանգաթաղը կազմված է հետևյալ տեղագրական շրջաններից՝

• կենտ ճակատ-կողմնա-ծոծրակային (regio fronto-parieto-occipitalis)
• զույգ քունքային շրջաններից (regio temporalis)։

Դիմային շրջանը բաժանվում է հետևյալ շրջանների՝

• Միջային՝
  • քթի շրջան (regio nasalis)
  • բերանի շրջան (regio oralis)
  • կզակի շրջան (regio mentalis)
  • ակնակապճի շրջան (regio orbitalis)
• Կողմնային մակերեսային՝
  • ծամիչ-հարականջային շրջան (parotideomasseterica),
  • թշի շրջան (regio buccalis)
• Կողմնային խորանիստ՝
  • դեմքի խորանիստ կողմնային շրջան (regio facialis lateralis profunda)